បញ្ហាចុកដើមទ្រូង (Chest Pain)

១.និយមនយ័:
👉ចុកដើមទ្រូងគឺជា

រោគសញ្ញាមួយដែលទាក់ទងនឹងជំងឺជាច្រើន ហើយដែលមានលក្ខណះនៃការចុកផ្សេងៗគ្នាដូចជាចុកលក្ខណះដូចមានវត្ថុមុតស្រួចចាក់ក្នុងដើមទ្រូង,ចុកណែនពេញ ទ្រូង,ចុកដូចគៀប ឬ រិត,ចុកដូចមានអ្វីមួយចាក់ឈិបៗ និង ចុកដូចមានលក្ខណះដូចរលាក ក្រហាយផ្សាក្នុងប្រអប់ទ្រូង ។ ហើយពេលខ្លះការចុកទ្រូងមានចាក់រាលដាលទៅក្រោយខ្នង ក ឬ ដៃ និង ថ្គាមជាដើម ពេលខ្លះចុកទ្រូងនេះក៏មិនមានចាក់រាលដាលទៅកន្លែងផ្សេងដែរ ។

២.មូលហេតុ: ចុកទ្រូងមានមូលហេតុជាច្រើនដែលត្រូវប្រុងប្រយ័ត្ន
👉បញ្ហាបេះដូង:
🔹ជំងឺស្ទះសសៃឈាមបេះដូង ដែលបណ្ដាលមកពីមានកំណកញ៉ុកជិតក្នុងសសៃឈាមបេះដូងដែលបណ្ដាលឲ្យឈាមមិនអាចហូរទៅចិញ្ចឹមសាច់បេះដូងបាន ។
🔹ជំងឺរហែកសសៃឈាមក្រហមធំ វាមានស្ថានភាពគ្រោះថ្នាក់ប្រសិនស្រទាប់ខាងក្នុងនៃសសៃឈាមត្រូវបានរហែក ព្រោះវានាំឈាមពីបេះដូងទៅចិញ្ចឹមសរីរាង្គ
🔹រលាកស្រោមបេះដូង គឺជារលាកស្រោមដែលព័ទ្ធជុំវិញបេះដូងដែលនាំអោយឈឺខ្លាំងដូចមានវត្ថុមុតស្រួច ហើយឈឺខ្លាំងឡើងពេលយើងដកដង្ហើមចូលជ្រៅ

👉បញ្ហាផ្លូវរំលាយអាហារ:
🔹ជំងឺច្រាលអាស៊ីតក្រពះ គឺជាតិអាស៊ីតក្រពះច្រាលចូលទៅបំពង់អាហារ និង ដល់បំពង់ក ដែលចុកទ្រូងមានលក្ខណះដូចជារលាកផ្សា ក្រហាយណែននៅក្រោមដោះ
🔹ជំងឺវិបត្ដិលេបអាហារ គឺបំពង់អាហារពិបាកបញ្ចូនអាហារចុះទៅក្រពះបណ្ដាលឲ្យ មានចុកទ្រូង
🔹ជំងឺគ្រួសនៅថង់ទឹកប្រមាត់ រលាកថង់ទឹកប្រមាត់ និង រលាកលំពែងគឺឈឺនៅតំបន់ពោះ ហើយចាក់រាលទៅប្រអប់ទ្រូង

👉បញ្ហាសាច់ដុំ ឆ្អឹង: ចុកទ្រូងខ្លះវាជាប់ទាក់ទងនិងការរលាក និង បញ្ហាទៅលើរចនាសម្ព័ន្ធរបស់ឆ្អឹង សន្លាក់ សាច់ដុំ និងសសៃប្រសាទនៅប្រអប់ទ្រូងផ្ទាល់តែម្ដង ដូចជា៖
🔹រលាកសន្លាក់ឆ្អឹងខ្ចីនៅទ្រូង
🔹រលាកសាច់ដុំ
🔹របួសប៉ះទង្គិចលើឆ្អឺងសន្ទះទ្រូង

👉បញ្ហាសួត: ជំងឺខាងក្រោមនេះសុទ្ធតែនាំឲ្យមានចុកទ្រូង
🔹ស្ទះសសៃឈាមនៅសួត
🔹រលាកស្រោមសួត
🔹ឡើងសម្ពាធឈាមនៅសួត , ជំងឺរលាកសួត

👉បញ្ហាផ្សេងៗ:
🔹ជំងឺរើមលើទ្រូងដែលវាបណ្ដាលឲ្យរលាកលើសសៃប្រសាទទ្រូងនៅទ្រូងនាំឲ្យឈឺទ្រូងដែរ
🔹ជំងឺភ័យខ្លាច Panic Attack ជំងឺនេះក៏មានចុកទ្រូងដោយរួមផ្សំបេះដូងដើរញាប់ ពិបាកដកដង្ហើម មានអារម្មណ៍ភ័យខ្លាច ចង់ក្អួតចង្អោរ ត្រជាក់ចុងដៃជើង ។

៣.ការធ្វើរោគវិនិច្ឆ័យ:
គ្រប់ការចុកទ្រូងទាំងអស់ត្រូវធ្វើរោគវិនិច្ឆ័យ​ឲ្យបានច្បាស់លាស់ព្រោះវាអាចបណ្ដាលអោយគំរាមគំហែងដល់អាយុជីវិត ដូចជា ស្ទះសសៃឈាមបេះដូង និង ស្ទះសសៃឈាមនៅសួតជាដើម ។ ការធ្វើតេស្តភ្លាមៗមានដូចជា
👉វាស់ចង្វាក់បេះដូង ( ECG ) ដែលអាចបង្ហាញឲ្យដឹងអំពីជំងឺស្ទះសសៃឈាមបេះដូង
👉តេស្តឈាម គឺរកមើលការកើនឡើងនូវកំរិត CPK / Troponin ដែលឲ្យដឹងពីការខូចខាតនូវសាច់ដុំបេះដូង
👉ថត X-ray ប្រអប់ទ្រូង អោយដឹងភ្លាមៗនូវស្ថានភាពរបស់សួត ទំហំបេះដូង និង សសៃឈាមធំៗ
👉CT Scan យើងរកមើលតំណក់ដែលនាំឲ្យស្ទះនៅសួត
👉អេកូបេះដូង រកមើលរចនាសម្ព័ន្ធ និង មុខងារខាងក្នុងរបស់បេះដូង
👉ការតេស្តដោយធាក់កង់ ឬ រត់លើក្ដាវិល ( Stress Test ) ដើម្បីអោយដឹងអំពីស្ថានភាពបេះដូង និង សសៃឈាមឆ្លើយតបពេលធ្វើចលនា
👉ការឆ្លុះសសៃឈាមបេះដូង ( Coronary Catheterization ) ដើម្បីអោយឃើញសសៃឈាមបេះដូងដែលត្បៀត ឬ ស្ទះដោយចាក់ម្ជុលមានបំពង់តូចចូលតាមសសៃឈាមក្រហមនៅក្រលៀន ឬ កដៃ ហើយប្រើថ្នាំម្យ៉ាងបាញ់បញ្ចូល និង ប្រើកាំរស្មីអ៊ិច និង វីដេអូ ។

៤.ការព្យាបាល:
👉ចំពោះការព្យាបាលគឺវាមានលក្ខណះខុសៗគ្នាដោយយោងទៅលើលទ្ធផលនៃមូលហេតុដែលបណ្ដាលអោយចុកទ្រូងនីមួយៗបើចុកទ្រូងដោយសារមូលហេតុអ្វីគឺព្យាបាលមូលហេតុនោះ ។